كثافة سكانية

الكثافة السكانيّة :
هو مقياس ديمغرافي يُستخدم عادةً في علم السكان لقياس معدّل عدد السكّان المُتواجدين في مَنطقة جغرافيّة مُعيّنة مثل الدول أو المدن أو البلديّات وأي منطقة مأهولة بالسكان، وذلك بقسمة عدد السكان على المساحة الكلية للمَنطقة الجغرافية.

المصطلح الموحد (*) الكثافة السكانيّة:
مفهوم الكثافة السكانيّة يختلف حسب البلدان و حتى عبر الزمن خذا معاني مختلفة و تطورت مع التطور الطبيعي للمدن. صحيح أن فما معنى واحد من الناحية الحسابية وهي أن الكثافة السكانيّة هي قسمة عدد السكان على المساحة الكلية للمَنطقة الجغرافية الي نحسبو عليها، لكن في نفس الوقت العناصر الي تكون هاذي العملية الحسابية وعناصر أخرى الي تفسر تطور المشؤرات هاذي هي الي تختلف من مكان إلى آخر.
ناخذو مصطلح “الـ متساكن” مثلا. شنوا الي يخلي بلاد تحسب المقيمين فقط كمتساكنين وبلاد أخرى تحسب أي شخص عندو أي نشاط في نفس المنطقة، مهما كانت طبيعة هذا النشاط: اقتصادي، اقامة، الخ. الي بش يفرق بين الحالتين هي الاستراتيجيا الديمغرافية اللي اتتبعها المنطقة أو البلاد بيدها.
وهنا مهم نحلو قوس بش نفهمو المقصود من التوجه الديمغرافي. نقصدو هنا مجموعة القرارات والسياسات إلي تأثر على تركيبة المجتمع من الناحية الكمية – عدد السكان وتوزيعهم في الحوم – أو النوعية – كيما الفئة العمرية أو الاقتصادية إلي تنتميلهة مجموعة من السكان مثلا. في كل الحالات، التوجه الديموغرافي متع البلاد عندو تأثير مباشر على الكثافة السكانية. وهاو بش نفهمو كيفاش.
في برشا دول، تحديد حاجياتنا كبلدية أو جهة من ناحية عدد المتساكنين أو طبيعة الأنشطة الي يقومو بيها عندو دور أساسي في السياسات التنموية. مثلا بلاد عندها مناطق صناعية ومساحات تسمحلها بش تخلق ديناميكية متع انتاج بش يساعدها تجلب أكثر المواطنين الراغبين في القيام بأنشطة اقتصادية، والا تعمل تحفيزات تخلي العمال في قطاعات معينة والمهاجرين يحبو يستقرو فيها. في حين أن أماكن أخرى بش تعتمد أكثر على الأنشطة السياحية فقط ومناطق أخرى بش تبجل المتساكنين وتخلي مصادر تمويلها متأتية من المعاليم الي يدفعوها المواطنين الأثرياء الي يلوجو على الهدوء مثلا. وهذاكا علاش نلقاو أماكن فيها كثافة سكانية ضعيفة ومدن أخرى الكثافة فيها كبيرة (بالمفهوم الحسابي)، سوى كانت مناطق سكانية – شعبية أو لا – والا مناطق صناعية.
وهنا وين طبيعة مسار اللامركزية المعتمد عليه في البلد مهم ياسر لأنه هو إلي بش يحدد شكون الطرف الي يقرر خصوصية كل منطقة والتوجه متاعها من الناحية التنموية والديمغرافية. ومهما كان النموذج، المهم أن تكون عندنا إستراتيجيا واضحة، ومن المستحسن كل الأطراف المعنية تشارك في وضعها بش تكون الديمغرافيا عنصر نجاح ومصدر تنمية مندمجة.

• كثافة سكانية
• متساكن
• تطوّر ديمغرافي
• تنمية حضرية مندمجة